O presidente da Xunta, Alberto Núñez Feijóo, destacou este venres a "histórica participación" dos deportistas olímpicos galegos nos Xogos de Tokio, "todo un fito" para a comunidade, ademais de valorar que "unha de cada tres medallas españolas" logradas nesta competición "fala en galego".
Feijóo recibiu á comitiva de participantes no Centro Galego de Tecnificación Deportiva onde repasou os logros obtidos polos medallistas Teresa Portela, Rodrigo Currais, Nico Rodríguez, Iván Villar, Ana Peleteiro, Rodrigo Germade e Carlos Arévalo e os 10 diplomas olímpicos a cargo de Niko Shera, Raquel Carreira, Tamara Abalde, Alberto Abalde, Iago López Marra, Támara Echegoyen, Adrián Ben, Antía Jácome, Carlos Arévalo, Emmanuel Reyes e Caetano Horta.
"Galicia está orgullosa", asegurou, para incidir en que o 72% dos galegos que participaron nos Xogos Olímpicos quedaron entre os 8 mellores do mundo. Moi emocionado durante a súa intervención, o presidente da Xunta enxalzou o esforzo e sacrificio dos deportistas.
Así mesmo, anunciou no seu discurso que a Oficina de Atención ao Deportista estará en pleno funcionamento para a tempada que vén, co obxectivo de seguir acompañando aos deportistas no camiño á excelencia.
O titular do Executivo galego tamén recordou que a Xunta impulsou nos últimos anos preto de medio milleiro de obras para mellorar as infraestruturas deportivas existentes
Esta oficina orientará e informará, permitirá detectar as necesidades que poidan xurdir e promover actuacións destinadas á divulgación e formación.
O titular do Executivo galego tamén recordou que a Xunta impulsou nos últimos anos preto de medio milleiro de obras para mellorar as infraestruturas deportivas existentes, prestando especial atención ás instalacións pontevedresas do CGTD, "a xoia da coroa", no que levan investidos 4,3 millóns de euros.
Finalmente, Feijóo expresou o seu desexo de que este bo resultado teña continuidade nos Xogos Paralímpicos.
