O presidente da Xunta, Alberto Núñez Feijóo, resaltou este martes o compromiso da administración galega coa atención á discapacidade reflectido nas novas liñas de actuación e nun aumento do orzamento para 2016 dun 10%.
Un incremento que ascende ata o 45% en comparación con 2009, uns 30 millóns de euros máis, destacou Feijóo durante unha visita ao centro residencial da congregación das Escravas da Virxe Dolorosa, en Crecente.
Destacou o incremento nun 20% dos convenios coas federacións que integran Cermi ou a aprobación da estratexia galega sobre discapacidade 2015-2016, que recolle máis de 400 actuacións en materia de accesibilidade, promoción da autonomía persoal, educación, formación, emprego, saúde e servizos sociais.
Feijóo aludiu tamén á creación de novos servizos de atención residencial e diúrna e á implantación da rede galega de atención temperá, que reforzará o apoio precoz ás persoas con discapacidade.
O presidente da Xunta reivindicou tamén o labor de quen colaboran desde a sociedade civil na atención discapacidade, e incidido no apoio da administración autonómica.
Valorou, para rematar, o labor do centro residencial de Crecente, no que a Xunta financia 60 prazas de discapacidade, que se suman ás 79 do centro que as Escravas da Virxe Dolorosa teñen en Mos.
Feijóo destaca o compromiso da Xunta coa atención á discapacidade
O presidente do Goberno autonómico destacou as novas liñas de actuación neste ámbito e o aumento do orzamento para 2016 dun 10%
