viernes. 18.09.2020 |
El tiempo
viernes. 18.09.2020
El tiempo

Feijóo non descarta actuacións legais da Xunta polo 'caso Fuenlabrada'

Unha persoa mira pola fiestra onde se aloxan os xogadores do Fuenlabrada. EUROPA PRESS
Unha persoa mira pola fiestra onde se aloxan os xogadores do Fuenlabrada. EUROPA PRESS
O presidente recrimina que o club ou La Liga ou "os dous conxuntamente" puxeron "en risco a saúde pública" cunha viaxe que "nunca debeu producirse" 
 
O presidente da Xunta, Alberto Núñez Feijóo, censura que houbo "unha enorme irresponsabilidade" na "conduta do Club de Fútbol Fuenlabrada" ou "da liga" ou dos "dous conxuntamente" na viaxe do equipo á Coruña con infectados por coronavirus. 

Preguntado polos medios pola decisión do Concello da Coruña de levar ao caso á xustiza e se o Goberno galego vai emprender accións legais, Feijóo explicou que se abriu un expediente informativo sobre o caso que "está a ser tutelado" pola asesoría xurídica da Xunta. "E se así o recomenda, farémolo", dixo. 

Así mesmo, sinalou que nese expediente informativo sanitario os inspectores de saúde pública "teñen todas as súas capacidades para facer o que se considere oportuno". 

"Ese expediente informativo sanitario pode traducirse en recomendacións para que sexan estudadas no ámbito da asesoría xurídica. O que é evidente é que aquí púxose en risco a saúde pública", sentenciou o presidente da Xunta. 

"Isto non é un comportamento normal, se hai un positivo o sábado e hai positivos o domingo, o partido celébrase o luns, o que non se pode é viaxar", recrimina.

"PÚXOSE EN RISCO A SAÚDE PÚBLICA".  Logo de desexar que a evolución da saúde dos infectados "sexa boa", reprochou que se puxo en risco a saúde pública". Considera que "non caben interpretacións" cando un ten unha enfermidade contaxiosa e a obrigación de comunicalo, de maneira que "non podía viaxar o equipo a Galicia". 

Así mesmo, sinalou que lle parece "moi sorprendente" que esta situación se vivise en La Liga, a competición "máis importante do mundo", xa que "esa viaxe nunca debeu producirse". 

Fai pública a súa "enorme decepción" polo sucedido, posto que o Fuenlabrada "non é un equipo estranxeiro que non coñeza os protocolos do país" ou un club "de afeccionados". 

Por iso, mostrou a súa "preocupación", á vez que quere que se coñeza "con exactitude que aconteceu", "que responsabilidades deportivas e que responsabilidades sanitarias están dentro deste caso". "Ninguén pode pór en risco da saúde pública dunha cidade, un territorio, unha comunidade ou un país", afirmou.

IMPACTO NA CORUÑA . O titular do Executivo autonómico lamenta que a viaxe do Fuenlabrada "xerou un risco innecesario", no que tacha de conduta "irresponsable" cun "impacto" na cidade da Coruña a nivel turístico e sanitario. 

A modo de exemplo, referiuse ao prexuízo para o hotel no que se aloxan os futbolistas, que "leva moitas cancelacións", entre elas "unha voda bastante ampla". 

No ámbito deportivo, o presidente da Xunta identifica que o Deportivo foi "prexudicado claramente", polo que cre que está no seu dereito "lexítimo" de presentar unha reclamación, pois "todo parece indicar que hai unha adulteración da competición". 
 

Feijóo non descarta actuacións legais da Xunta polo 'caso Fuenlabrada'
comentarios