O presidente da Xunta en funcións, Alberto Núñez Feijóo, cargou contra as "condutas imprudentes" da cidadanía que "incrementan os riscos" de contaxio de Covid-19, por ser un "menosprezo" aos profesionais sanitarios que loitaron contra a pandemia e que este venres recibiron a Medalla de Ouro de Galicia. Así o manifestou o titular do Goberno autonómico en funcións, durante a cerimonia de entrega deste galardón que se celebrou no Museo Centro Gaiás, na Cidade da Cultura de Santiago.
Os encargados de recollelo foron 18 representantes do colectivo de profesionais do Servizo Galego de Saúde (Sergas), co coordinador de Urxencias do Hospital do Salnés, Manuel José Vázquez Lima, como o seu portavoz. "Premiamos a todas as mulleres e todos os homes que coidaron a Galicia. En definitiva, que nos coidaron", resumiu Feijóo, quen tamén advertiu que as imprudencias significan "esquecer ás 619 persoas que levou" o coronavirus na Comunidade.
Ademais, o presidente da Xunta en funcións aproveitou a súa intervención para reivindicar o carácter de Galicia como "nacionalidade histórica", tal e como o establece a Constitución, e para asegurar que a concepción galega do autogoberno "implica, esixe e demanda a defensa do público", xunto coa "defensa da identidade".
"A experiencia autonómica que acumulamos é testemuño de que os galegos sabemos gobernarnos e cumprir en cada momento co noso deber, como demostran arreo as mulleres e homes da nosa sanidade", agregou.
Neste contexto, tamén mencionou á Xeración Nós —que este 2020 cumpre o seu centenario— e as Irmandades da Fala, que representan "eses espíritos pioneiros" que se dan a man cunha irmandade contemporánea formada polos sanitarios galegos".
Feijóo tamén reservou parte do seu discurso a recordar o accidente do tren Alvia no barrio compostelán de Angrois, que ocorreu o 24 de xullo de 2013 —este venres cúmprense 7 anos— e que deixou 80 vítimas mortais e 144 persoas feridas. Así, trazou un paralelismo entre este sinistro e a pandemia para destacar que a Galicia actual "é a mesma que orixinou o espírito de Angrois hai hoxe sete anos".
Pola súa banda, o coordinador de Urxencias do Hospital do Salnés, Manuel José Vázquez Lima, tomou a palabra en representación do colectivo premiado coa Medalla de Galicia 2020 e estendeu o galardón a todas "as categorías" do Sergas, á vez que expresou que o coronavirus deixa neles "unha marca que non se borrará nunca".
Á cerimonia tamén acudiron diferentes personalidades da administración e a política galega, como o presidente do Parlamento autonómico, Miguel Ángel Santalices; o extitular da a Xunta Emilio Pérez Touriño; a portavoz nacional do BNG, Ana Pontón; o secretario xeral do PSdeG, Gonzalo Caballero; e membros do Goberno galego en funcións, entre outros.
