jueves. 15.04.2021 |
El tiempo
jueves. 15.04.2021
El tiempo

Feijóo avanza a apertura de boa parte da hostalería a próxima semana

Cierre de la hostelería en Lugo. SEBAS SENANDE
Peche da hostalería en Lugo. SEBAS SENANDE
O presidente da Xunta non concretou nin horario nin intensidade, algo que deberá decidir o comité clínico o vindeiro luns

O presidente da Xunta, Alberto Núñez Feijóo, avanzou este venres que "boa parte" de Galicia comezará a abrir a hostalería tras a reunión do comité clínico do próximo luns, aínda que sinalou que haberá que ver "con que intensidade e con que horario". 

Nunha entrevista na Cadena Cope, Núñez Feijóo indicou que a evolución de datos da pandemia está a ir ben e insistiu en que é preciso agardar á reunión do comité clínico do próximo luns, xa que a Xunta se toma "en serio as súas opinións" e nun momento de pandemia, como o actual, as opinións sanitarias son "prioritarias". 

O pasado luns Galicia comezou un tímido proceso de desescalada, en vigor desde este mércores, coa volta do comercio ao seu horario habitual, excepto os centros comerciais, que seguen pechados as fins de semana, e coa reapertura de bibliotecas, museos e o permiso para realizar algunhas prácticas deportivas ao aire libre, entre outras medidas. 

O presidente galego destacou que Galicia está "a piques de ter unha situación xa controlada", tras o forte incremento de casos e contagios e, sobre todo, de falecementos producidos nesta terceira vaga.

VER MÁS. Encontros con Sergio Vázquez, membro do comité clínico: "Isto vai durar moito. Hai que recordar que aínda que esteas vacinado aínda podes contaxiar"

De todos os xeitos, Núñez Feijóo insistiu en que Galicia é a comunidade peninsular "cunha menor porcentaxe de mortalidade" desde o inicio da pandemia. 

No que vai de febreiro morreron máis de 350 persoas na comunidade por mor da covid-19, mentres que o número total de falecidos alcanza os 2.154. 

Segundo os últimos datos do Servizo Galego de Saúde, recollidos ata as 18.00 horas do xoves, o número de casos activos baixa ata os 10.040 (-868) e o número de hospitalizados descende en 50 persoas, ata 813. 

Dos hospitalizados, 169 permanecen na Uci (-11), polo que xa son menos que no pico da primeira onda (178), en abril do ano pasado, por primeira vez desde o pasado 26 de xaneiro.

Feijóo avanza a apertura de boa parte da hostalería a próxima semana
comentarios