O presidente da Xunta, Alberto Núñez Feijóo, avanzou que as medidas que se adoptarán en Galicia tras a reunión do comité clínico de expertos deste martes serán "máis restritivas", co fin de afrontar as consecuencias dunha terceira onda de contagios de coronavirus que será "igual ou superior" á do mes de novembro.
Pronunciouse así a preguntas dos medios en Santiago, o mesmo día no que se reúne o comité de expertos que asesora o Goberno galego co fin de abordar o importante repunte dos casos de covid na comunidade e as novas restricións que se implantarán para intentar paliar esta situación.
Feijóo non entrou en detalles sobre as medidas concretas que se adoptarán no encontro, aínda que si avanzou que non serán homoxéneas para toda a comunidade. O comité vai estudar a situación "de cada municipio e de cada comarca" para aplicar accións "proporcionadas" á evolución epidemiolóxica de cada localidade, polo que non será "un traxe igual para todos".
As novidades entrarán en vigor probablemente o venres, segundo avanzou o titular da Xunta, quen citou entre as actividades as que poden afectar as dos ximnasios ou as salas de xogos, ademais da hostalería.
Recoñeceu que cun confinamento xeral a nova onda "duraría menos tempo", pero asegurou que é preciso seguir "traballando, estudando e mantendo as actividades esenciais", polo que a "gran materia" da que se examinarán nas próximas semanas será facer compatible a redución da curva de contaxios co mantemento destas actividades.
A Xunta advirte de que a situación "vai seguir deteriorándose" nas próximas xornadas
O obxectivo é facer fronte a unha situación que se seguirá deteriorando durante as próximas semanas. "Non hai máis novidades que confirmar que desde hai tres ou catro días a incidencia está a subir, así como o incremento na positividade de PCR e de novos casos a 3, 7 e 14 días de forma seguida e constante, e vai durar polo menos este mes de xaneiro", dixo nun acto en Santiago.
Atendendo aos últimos datos do Sergas, a escalada de contagios por covid-19 en Galicia segue o seu curso e xa hai 8.810 casos activos, 560 máis que no anterior reconto. Hai apenas unha semana a comunidade acumulaba 5.991 contaxios activos.
Os datos que manexa a Xunta apuntan a que a situación "vai seguir deteriorándose" nas próximas xornadas e ao longo de todo o mes de xaneiro, como unha bóla "que se vén formando nas últimas semanas" por mor das "accións individuais ou colectivas" das festas de Nadal. "Esa terceira onda vai ser igual ou superior, eu creo que superior, á que tivemos no mes de novembro", advertiu Feijóo.
Tamén recordou que a Xunta "sempre propuxo" que non se celebrasen actividades sociais con non convivientes ou "como moito dúas unidades familiares" e anticipou o "alto risco" do concepto de achegados e das reunións "de ata dez" persoas. De feito, Feijóo asegurou que se intentou "limitar" o número de persoas nos encontros familiares mais alá destes termos, pero a asesoría xurídica advertiu de que carecían de competencias "para facelo" por tratarse de lexislación estatal.
