A caída dunha árbore provocou a morte dun traballador este xoves en Brión, na parroquia de Ons. Atendendo á información divulgada polo 112 Galicia, a árbore caeulle enriba.
A alerta do accidente levou a mobilizar un helicóptero para atender a vítima, aínda que —segundo subliña a central de urxencias— "nada se puido facer por salvarlle a vida".
Tamén interviñeron o GES de Brión, Protección Civil de Ames e a Policía Local dese municipio.
🔴 #AXEGAInforma de que un traballador faleceu ao caerlle unha árbore enriba, en #Ons, no @concellodebrion. O persoal sanitario mobilizou ata o punto un helicóptero, pero nada puido facerse por salvarlle a vida. Interviñeron: #GESBrión, #AVPCAmes e Policía Local de Ames pic.twitter.com/DUpxfN2lyq
— 112Galicia (@112Galicia) September 30, 2021
Este mesmo xoves, o 112 Galicia tamén recibiu un aviso por outro accidente laboral en Santiago de Compostela, neste caso no lugar de Miramontes, na parroquia de Grixoa.
Ao redor das dez e media da mañá, os servizos sanitarios informaban de que un traballador resultara ferido logo de envorcar cunha retroescavadora, que comezou a arder e resultou calcinada case completamente.
O operario foi trasladado ao Complexo Hospitalario Universitario de Santiago.
