O médico compostelán José Carro Otero, presidente da Real Academia de Medicina e Cirurxía de Galicia, faleceu este venres aos 78 anos, segundo confirmaron a Efe fontes familiares.
O facultativo, antropólogo, docente e académico morreu no seu domicilio na capital galega a pasada madrugada, precisaron as fontes.
Carro Otero recibira diversas condecoracións, a última delas a Cruz do Mérito Militar outorgada polo Ministerio de Defensa o pasado ano. En 2013 tamén foi nomeado membro de honra do Colexio Oficial de Odontólogos e Estomatólogos de Lugo.
PESAR. Varios políticos e compañeiros de Carro Otero lamentaron a repentina morte do médico que tamén exerceu de profesor da Universidade de Santiago de Compostela, entre eles o presidente da Xunta, Alberto Núñez Feijóo.
Feijóo sinala na súa conta dunha rede social que Carro Otero era "un referente na mecidina, na docencia e na investigación que terá sempre un lugar destacado na nosa historia".
HEMEROTECA. Hai pouco máis dun ano, Carro Otero falaba nunha entrevista en El Progreso sobre a expedición que partiu de Galicia no XIX para estender a vacina das vexigas, o que definiu como "o maior fito do medicamento preventivo".
O seu ollo experto tamén foi responsable do descubrimento dun tesouro oculto durante tres séculos no altar da igrexa de Santiago de Taboada, en Silleda.
