Un veciño de Cambados de iniciais F.F.P. faleceu na madrugada deste mércores no termo municipal pontevedrés tras ser atropelado por un vehículo na VG-4.3, á altura da saída de Corvillón, sentido AG-41.
Un particular púxose en contacto ás 4.30 horas co Centro Integrado de Atención ás Urxencias (Ciae) 112 Galicia para comunicar o suceso e solicitar asistencia urxente para unha persoa tendida na vía.
No dispositivo de urxencias participaron o persoal do 061-Urxencias Sanitarias, os Bombeiros de Ribadumia e axentes da Garda Civil.
Ata ao lugar do accidente tamén acudiron a Policía Local e Protección Civil de Cambados, que ademais solicitaron medios de limpeza para retirar os restos do accidente e restablecer as condicións de seguridade na vía. Descoñécense aínda as causas do suceso.