O dono da pirotecnia La Gallega, que estivo situada Baldráns, a poucos quilómetros da vivenda na que se produciu a explosión de Tui, foi detido este mércores por homicidio por imprudencia e estragos. O arrestado foi trasladado á Comandancia da Garda Civil de Pontevedra.
A forte explosión rexistrada na parroquia de Paramos produciuse nunha vivenda particular, propiedade dun familiar da pirotecnia que fora precintada por orde xudicial.
Así o explicou a Europa Press o exalcalde de Tui, Enrique Cabaleiro, quen confirmou que el mesmo asinou a orde de precinto de devandita pirotecnia, situada en Baldráns (a uns poucos quilómetros da vivenda onde se produciu o suceso), en cumprimento dunha resolución xudicial por un contencioso derivado de problemas urbanísticos.
"Todo parece indicar que o responsable da empresa, unha vez que esta quedou precintada, trasladou a esa vivenda particular dun familiar ou ben a actividade ou, polo menos, o material pirotécnico para ser almacenado", sinalou.
A explosión, que se escoitou en todo o sur da provincia de Pontevedra, produciuse sobre as 16.25 horas e a magnitude da onda expansiva provocou danos materiais moi importantes tanto na zona de Paramos (con numerosas vivendas afectadas) como noutras áreas máis afastadas.
De feito, tras a deflagración orixinouse un incendio e a columna de fume foi visible incluso desde puntos altos de Vigo ou Redondela.
