O Eixo Atlántico traballa na elaboración dun mapa para detectar a pobreza. O obxectivo deste sistema, que permitirá coñecer a situación social e económica das cidades e municipios, é evitar "bolsas de marxinación" a través da activación de políticas públicas de reactivación. Así o avanzou este xoves no encontro de alcaldes celebrado en Pontevedra o secretario xeral da entidade transfronteiriza, Xoán Vázquez Mao, quen confirmou que a iniciativa estará lista o ano que vén.
A Eurorrexión Galicia-Norte de Portugal tamén porá o acento na necesidade de poñer en marcha novos modelos urbanos. A intención é a creación dun plan de mobilidade urbana sostible que tratará de impulsar iniciativas para limitar o uso do coche e promover outras formas de transporte. Con esta medida buscarase mellorar os parámetros ambientais e contribuír á loita contra a urxencia climática.
Vázquez Mao defende que o Goberno non pode destinar axudas do fondo de reconstrución a empresas cuxo capital non sexa español
Vázquez Mao reivindicou como exemplo a exportar o papel "innovador" e de colaboración entre os municipios transfronteirizos para superar as adversidades. "Somos dous territorios similares, pero dispares que demostramos que somos quen de axuntar esforzos. A pesar das distintas cores políticas, falamos e chegamos a puntos de acordo. Ese ten que ser o espello onde mirarnos", dixo respecto da nova etapa que se abrirá logo da crise do coronavirus.
O secretario xeral do Eixo sinalou, ademais, que a saída a esta situación non pode ser a aposta polos empregos precarios. "Cantos destes traballos lle permiten á xente ter un proxecto de vida? E manter a Seguridade Social e pagar impostos para manter a educación?", dixo para reclamar postos de traballo "de calidade".
"CABALO DE TROIA". Vázquez Mao referiuse tamén ao fondo de reconstrución ao que o Goberno de España ten acceso para axudar a empresas que están en apertos. E fíxoo a título individual para defender que esta liña de apoio económico non pode chegar a compañías como Iberia ou Vodafone, "que non son empresas do noso territorio e nin sequera son españolas, senón do Reino Unido, que abandonou a Unión Europea".
"España non debe de actuar como un cabalo de Troia para que o diñeiro da UE vaia a empresas inglesas, senón que debe de ou investir en quen paga aquí os seus impostos e xeran riqueza e con iso manteñen a sanidade, educación e a propia administración pública", dixo, para reclamar que estes recursos se utilicen nas firmas de proximidade. "Teñen que ser para as nosas empresas e para vos nosos autónomos", concluíu.