A Eurocámara concederá 3,2 millóns a Galicia para paliar os danos dos lumes de 2017

Portugal obterá 50,6 millóns para paliar os danos dos lumes que devastaron as rexións do centro e o norte do país entre xuño e outubro de 2017

Superficie queimada en Cervantes. J.VÁZQUEZ
photo_camera Superficie queimada en Cervantes. J.VÁZQUEZ

O pleno do Parlamento Europeo aprobou este mércores conceder a España 3,2 millóns do Fondo de Solidariedade da UE para paliar os incendios forestais que tiveron lugar en Galicia ao longo de 2017 e, singularmente, durante a vaga de lumes vivida a mediados de outubro. 

En concreto, os eurodeputados aprobaron un paquete de 104,2 millóns de euros en axudas a España, Portugal, Francia e Grecia que se dedicarán a compensar a estes países por diversos desastres naturais. 

Portugal obterá 50,6 millóns para paliar os danos dos lumes que devastaron as rexións do centro e o norte do país entre xuño e outubro de 2017. 

Pola súa banda, Francia obterá 49 millóns de euros para paliar os efectos dos furacáns Irma e María nas rexións de Saint Martin e Guadalupe en setembro de 2017. 

Por último, Grecia recibirá 1,3 millóns de euros para reparar edificios afectados polo terremoto de Lesbos en xuño de 2017. 

Trátase da terceira vez que España recibe diñeiro do Fondo de Estabilidade despois de obter 1,3 millóns de euros en 2003 tamén por danos de incendios forestais e 21,1 millóns en 2011 polo terremoto de Lorca.

Comentarios