O xulgado de instrución de Caldas de Reis decretou o ingreso nun centro psiquiátrico penal da única sospeitosa de dar morte de forma violenta ao seu curmán, un octoxenario na parroquia morañesa de Amil.
A investigada residía co falecido (era a filla da súa parella, que á súa vez era prima da vítima), e foi detida nas últimas horas, en canto foi dada de alta no Complexo Hospitalario de Pontevedra, onde permanecía ingresada desde o 20 de maio, cando sucederon os feitos.
A Garda Civil de Pontevedra considera que esta muller acabou coa vida do seu achegado a puñaladas, o que levou ao xuíz a ditar a medida de privación de liberdade incondicional que, iso si, cumprirase nun centro especializado de fóra de Galicia, dado que a presunta homicida padece unha enfermidade mental.
O cadáver do ancián, que foi brutalmente apuñalado cunha arma branca, apareceu nas inmediacións da súa vivenda, situada no lugar do Apedrado (Moraña) e presentaba múltiples signos de violencia, entre eles, varias puñaladas executadas cunha arma branca.
Agustín Chayán, de 84 anos, residía cunha curmá súa e a filla desta e, segundo os veciños, as discusións no domicilio eran "constantes", precisamente pola patoloxía psiquiátrica da moza, polo que sinalaron que este desenlace se vía vir".
Internan nun psiquiátrico á acusada do crime de Amil
A investigada era a filla da parella do falecido e residía con el. Foi detida este luns
