Os traballadores da empresa Los Telares, con 16 tendas en Galicia, irán á folga o próximo 27 de maio polos atrasos nos pagos das nóminas e para esixir un plan de estabilidade que lles garanta o emprego.
Los Telares, propiedade de Julián Rus e dedicada ao comercio téxtil, ten a súa central en Asturias e suma 16 tendas en Galicia: 7 na Coruña, 3 en Lugo, 2 en Ourense e 4 en Pontevedra.
A empresa permaneceu en concurso de acredores ata abril do pasado ano e meses máis tarde asinaron un acordo cun fondo de investimento estranxeiro que inxectou capital a cambio da cesión da firma "durante 30 anos", expón a Federación de Comercio de CC.OO. en Galicia, que estima a débeda concursal do grupo en 22 millóns de euros, aos que suman 8 millóns máis desde 2014.
A dirección tratou de expor un Erte que se pechou sen acordo en abril.
Da débeda total, case dous millóns de euros é o que o sindicato estima que se lles debe aos empregados galegos, en tres pagas extraordinarias a cada un, mentres esperan polos seus salarios "en tendas baleiras onde están cos brazos cruzados" e sen mercancía para a venda en locais alugados que non teñen os pagos da renda ao día.
Traballadores do persoal ferrolán indicaron a Efe que tampouco percibiron a última nómina de abril e non teñen esperanza de cobrar en maio.
Os empregados da central en Asturias serán os primeiros en iniciar a folga, que xa fixaron para o próximo 19 de maio.
Empregados de Los Telares en 16 tendas galegas irán a folga por atrasos nos pagos
A empresa permaneceu en concurso de acredores ata abril de 2014 e meses máis tarde un fondo de investimento inxectou capital a cambio da cesión da firma
