O Grupo Parlamentario Popular avanzou que proporá no pleno ordinario da próxima semana a designación da deputada e viceportavoz Elena Candia
Candia, presidenta provincial do PP de Lugo, cubrirá a vacante que deixou o seu homólogo coruñés, Diego Calvo, a quen o presidente Alfonso Rueda situou como vicepresidente segundo e conselleiro de Presidencia, Xustiza e Deportes da xunta.
Licenciada en Dereito e doctoranda no estudo de entes locais, Candia foi alcaldesa de Mondoñedo desde 2015 ata marzo de 2020.
Tamén ocupou o cargo de portavoz do Grupo Provincial do PP na Deputación de Lugo desde finais de 2011, institución que presidiu nun breve período, desde xullo a outubro de 2015.
A nivel orgánico, desde marzo de 2016 é a presidenta provincial do PP de Lugo. Así mesmo, é membro da Comisión de Igualdade da Federación Española de Municipios e Provincias (FEMP).
Candia será agora a vicepresidenta primeira da institución que dirixe o ourensán Miguel Santalices, presidente da Cámara autonómica. Acompáñanlles na Mesa do Parlamento a nacionalista Montse Prado como vicepresidenta segunda, a popular Corina Porro como secretaria e a socialista Mariña Ortega como vicesecretaria.
