O rei emérito Juan Carlos saíu a navegar este venres ao redor de tres horas nas Rías Baixas a bordo dun dos barcos clásicos da categoría 6mR, na que ten previsto competir este ano.
Acompañado do seu amigo Pedro Campos, director xeneral do equipo Movistar e presidente do Real Club Náutico de Sanxenxo, don Juan Carlos saíu á Ría de Pontevedra pasadas as catro da tarde para familiarizarse coa embarcación, aproveitando o bo tempo nas Rías Baixas, onde xa estivo a navegar o pasado outono.
A idea de Campos é que os patróns vaian tomando contacto con estes barcos clásicos e, a principios de abril, poder realizar a presentación oficial da flota, así como dar a coñecer o nome que levará o circuíto e o calendario de competición.
En principio, está previsto que se disputen nove regatas, das cales seis ou sete serían en Sanxenxo.
A organización reservou unha praza para don Juan Carlos, que podería competir con grímpola do RCN de Sanxenxo, club do que é presidente de honra.
