miércoles. 11.12.2019 |
El tiempo
miércoles. 11.12.2019
El tiempo

BNG e PPdeG piden cifras concretas para apoiar o financiamento

Los representantes económicos de los partidos gallegos se reunieron con el conselleiro de Economía (AGN)
Los representantes económicos de los partidos gallegos se reunieron con el conselleiro de Economía (AGN)

O BNG e o PPdeG criticaron este venres a falta de concreción e cifras do novo modelo de financiamento autonómico presentado o pasado martes polo vicepresidente Pedro Solbes, mentres que o PSdeG chamou ao consenso para lograr as mellores condicións para Galicia.

O conselleiro de Economía, José Ramón Fernández Antonio, e os portavoces de economía dos grupos parlamentarios de PP, PSdeG e BNG, Carlos Aymerich, Xaquín Fernández Leiceaga e José Antonio Orza respectivamente, reuníronse para avaliar o documento.

Fernández Antonio destacou elementos positivos da proposta como a inclusión da dispersión e o envellecemento poboacional entre os criterios da repartición, así como a maior autonomía financeira. Ademais, explicou que ''Galicia contará con máis recursos económicos por habitante''.

Con todo, a oposición pediu cifras concretas para poder acudir o Consello de Política Fiscal e Financeira (CPFF), onde está previsto que as comunidades autónomas debatan multilateralmente a proposta, coas contas ben feitas.

Cifras concretas
O conselleiro de Economía defendeu a ''posición activa'' de Galicia na negociación e resaltou que ''o obxectivo é manter unha posición de país unánime'', para o que reiterou a súa chamada ao consenso.

O portavoz do grupo parlamentario do BNG, Carlos Aymerich, mostrouse escéptico sobre o resultado da reunión. ''Seguimos no ceo dos conceptos abstractos e nós queriamos baixar ao chan das cifras concretas'', lamentou.

''Galicia ten que fixar o seu modelo e negociar bilateralmente co Estado'', afirmou, pensando na próxima reunión do CPFF, que augurou para finais de xaneiro. ''Todos estamos no mesmo barco, que é conseguir o mellor sistema financero para Galicia'', concluíu.

Coartar posibilidades
Fronte a isto, o portavoz do PSdeG, Xaquín Fernández Leiceaga, mostrouse confiado ''na capacidade do conselleiro de Economía e da Xunta para defender os nosos intereses'' e cualificou a reunión de ''moi frutífera''.

Sinalou ademais que o feito de acudir á negociación cunha cifra fixada non sería unha boa ''estratexia negociadora''. ''Moitas veces, pór números enriba da mesa é coartar posibilidades'', explicou en oposición ao defendido por Aymerich.

Premios menores
Desde o PPdeG, José Antonio Orza sinalou que o documento é ''ambiguo'' e falto de concreción, indicando que non presenta solucións ''ben definidas'' e alertou de que ''haberá Premio Gordo para uns (en alusión ás autonomías máis ricas) e outros terán que conformarse con premios menores''.

Criticou o 'popular' que a solidariedade interterritorial só se aplique á educación, a sanidade e os servizos sociais, deixando fóra temas como xustiza, vivenda ou infraestruturas, entre outros.

Para que o documento fose satisfactorio para o PP, sinalou, debería ter en conta o factor da emigración, contar cunha ponderación adecuada das variables básicas -non só idade e dispersión senón tamén climatoloxía e orografía- e, sobre todo, que Galicia ''non perda posicións relativas''.

BNG e PPdeG piden cifras concretas para apoiar o financiamento
Comentarios