A Policía Nacional detivo en Xaén dúas mulleres presuntamente especializadas en furtos ao descoido aproveitando as aglomeracións das rebaixas para abordar ás súas vítimas. O grupo itinerante ao que pertencen as detidas cometería furtos tamén en Galicia e outras comunidades.
As mulleres foron sorprendidas por axentes de paisano cando se atopaban buscando vítimas propicias nunha entidade bancaria, segundo informou este venres nunha nota o citado corpo policial.
A investigación comezou logo de detectarse nos últimos meses a comisión de diversos furtos ao descoido ao redor de entidades bancarias e en establecementos comerciais do centro da capital, polo que se activou un dispositivo para localizar e deter os presuntos responsables. Os axentes realizaron diversas xestións que levaron a determinar a participación destas dúas mulleres en múltiples feitos delituosos, de maneira que se lles puido imputar tres furtos ao descoido.
Foron sorprendidas nunha entidade financeira da zona centro de Xaén, cando xa seleccionaran á súa vítima, xeralmente persoas de avanzada idade, propicias para subtraerlles a carteira ao descoido, aínda que durante todo o día levaban a cabo igualmente furtos de carteiras en establecementos comerciais e de lecer.
No marco das pescudas púidose averiguar que son integrantes dun grupo itinerante e teñen antecedentes de actuacións en diferentes capitais de provincia como Granada, Valladolid, Barcelona, Pontevedra, Santander, Soria, Zaragoza, Málaga e Oviedo.
A investigación segue aberta e continúanse as xestións para o esclarecemento doutros feitos delituosos que puidesen ser cometidos por este grupo. Foi levada a cabo por axentes da Brigada de Policía Xudicial da Comisaría Provincial de Xaén.
Dúas detidas en Xaén por cometer furtos en Pontevedra e outras cidades
Son integrantes dun grupo itinerante que aproveitaba as aglomeracións das rebaixas para abordar ás súas vítimas
