As carreiras universitarias que en Galicia esixen a nota máis alta de acceso no primeiro prazo de matrícula, que se abre este mércores, son tres dobres graos: Matemáticas e Física, Matemáticas e Enxeñería Informática e Xornalismo e Comunicación Audiovisual.
Todas elas, impartidas no campus compostelán da Universidade de Santiago (USC), están nos seus primeiros anos de vida. As notas das últimas persoas convocadas para matricularse neste primeiro prazo son de 13,552 sobre 14 en Matemáticas e Física, 13,100 en Matemáticas e Informática e 13,014 en Xornalismo e Comunicación Audiovisual.
Deste xeito, todos os convocados nestas e o resto de carreiras que se imparten en Galicia teñen de prazo para matricularse desde este mércores ata este venres 19 de xullo, ás 14.00 horas, segundo informa a Comisión Interuniversitaria de Galicia O trámite faise a través de internet.
Fóronlles asignadas prazas a alumnos que se presentaron ás probas de Avaliación do Bacharelato para o Acceso á Universidade (Abau), a titulados de Formación Profesional, estudantes maiores de 25 anos, estranxeiros de países non membros da Unión Europea, deportistas de alto nivel e estudantes con discapacidade preinscritos, todos eles, o pasado mes de xuño.
MEDICINA SEGUE EN CABEZA. No que se refire a titulacións únicas, o grao en Medicina da USC segue sendo o que máis nota esixe. Neste primeiro corte, a última persoa admitida ten unha nota de 12,575. A Medicina séguena Biotecnoloxía (12,446), Odontoloxía (12,080) e Enfermería (11,786). Outras carreiras doutros ámbitos que tamén teñen unha nota de corte moi alta son Matemáticas (11,632) e Xornalismo (10,455).
Nas outras dúas universidades galegas, A Coruña (UDC) e Vigo, as titulacións cunha maior nota de corte son o dobre grao de Bioloxía e Química no campus coruñés —cun 11,014— e Enxeñería Aeroespacial no campus ourensán da UVigo (11,693).
Outras carreiras que destacan polo seu nivel de dificultade no acceso son Fisioterapia (11,008) e ADE e Dereito (10,890), na Coruña, e Enxeñería Biomédica (11,550) e Tradución e Interpretación Español-Inglés, en Vigo (11,140).
Deste xeito, as titulacións da rama de ciencias e ciencias da saúde mantéñense como as máis demandadas, coa excepción do grao en Tradución e Interpretación Español-Inglés da UVigo ou os graos en Xornalismo ou Comunicación Audiovisual da USC, todos eles con notas de corte superiores ao 10.
