Axentes da Policía Nacional de Santiago de Compostela detiveron a catro persoas en relación aos danos producidos nun piso turístico alugado supostamente por unha parella para a realización dunha festa ilegal en abril de 2021, “en plena pandemia do covid-19”.
Segundo informa a Policía Nacional, os feitos sucederon aproximadamente hai un ano, na madrugada do 23 ao 24 de abril de 2021, data na que a propietaria dun apartamento situado na zona vella de Santiago de Compostela alugouno a través dunha plataforma de Internet, supostamente a unha parella que só estaría unha noite.
A Policía recorda que “naquel entón estabamos en plena pandemia polo covid, o que supuña que se atopaban en vigor múltiples limitacións, entre elas a que prohibía a reunión de máis de catro persoas en domicilios".
Con todo, explican, "o que parecía un aluguer rutineiro, transformouse nunha festa ilegal ao grande onde acudiron entre 15 e 20 mozas, a maioría universitarios e residentes por aquel entón na capital galega".
Segundo a investigación, cinco homes a través de diferentes chats de mensaxería organizaron a festa "invitando a numerosas persoas, a pesar das limitacións vixentes por aquel entón".
Decatáronse do sucedido cando a dona do piso acudiuse na súa vivenda para ver como quedara tras alugar a mesma supostamente a unha parella e atopouse o piso "esnaquizado" con botellos "e cabichas por todas partes, cristais e lámpadas rotas, un sofá esnaquizado, colchóns desgarrados e incluso un reguero de sangue polo chan".
Ademais das desfeitas da casa, os detidos tamén levaron un televisor, un rúter e unha vaixela, o que suman unhas perdas que a propietaria cuantificou en máis de 5.000 euros.
Froito da investigación realizada, a Policía puido pescudar que na festa participaran un home e unha muller, que tras varias declaracións finalmente achegaron os datos suficientes "para canalizar a investigación", indican as mesmas fontes.
Por estes feitos producíronse catro detencións en Santiago e impútaselles a presunta comisión de varios delitos de apropiación indebida, danos e simulación de delito.
Con todo, sinala a Policía, a investigación continúa aberta para a localización do último dos organizadores, que actualmente non reside na capital galega.
