A Policía Local de Vigo detivo un home de 48 anos acusado de patear e tirar por un desnivel duns dous metros a súa parella durante unha discusión no barrio de Teis. Ao chegar a patrulla ao lugar da agresión, os axentes viron que varias persoas rodeaban a unha muller que estaba tendida no chan, acompañada dun home.
A muller, de 39 anos, presentaba diversas rojeces en todas as zonas visibles do seu corpo debido a que, tras ser lanzada pola súa parella, caeu nunha zona chea de ortigas. Debido á dor que lle producían as picaduras e ao seu estado de nerviosismo, apenas puido relatar o sucedido aos axentes.
Foi unha testemuña quen se ofreceu a explicar que vira á parella discutindo e que nun momento dado o home deulle unha patada nas pernas á muller, tras o cal suxeitouna polas mesmas e tirouna polo terraplén. O presunto agresor recoñeceu que discutira coa súa parella pero negou tela agredido.
OUTRO ARRESTADO. Noutra intervención, a Policía Local de Vigo detivo este martes a outro home, de 46 anos, ao que sorprenderon no coche xunto á muller á que ten prohibido achegarse por orde xudicial. Ela alegou que retirara a denuncia que deu pé á orde de afastamento e que minutos antes telefonara ao detido para que a fose a recoller. Este arresto produciuse durante un control de tráfico na rúa Emilia Pardo Bazán.
Ademais de corroborar a orde de afastamento en vigor respecto do seu acompañante, os axentes comprobaron que o vehículo carecía de seguro obrigatorio e non tiña pasada a ITV. Adicionalmente, o detido deu positivo en cannabis e cocaína.
