O labor conxunto da Policía Nacional e a Garda Civil volveu dar froitos na xornada deste venres coa detención do terceiro tripulante do semisomerxible incautado o domingo pasado na ría de Aldán. O arrestado, veciño de Vigo, caeu en mans da unidade con base na Comisaría de Pontevedra Greco Galicia. O sospeitoso estaba nos montes próximos ao lugar do afundimento, aínda vestido co traxe de neopreno, acazapado e famento. Paralelamente, o ECO Galicia con base en Pontevedra detivo en terra outros dous individuos como presuntos membros da organización criminal. Ambos estaban a ser vixiados.
A investigación comezou no mesmo momento no que o sospeitoso conseguiu eludir o cordón policial disposto fronte aos areais de Punta Couso, lugar no que os narcos afundiron o submarino. O individuo puido darse á fuga aproveitando o seu coñecemento do terreo e permaneceu durante varios días case sen comer
A fuga produciuse nun primeiro momento a través de pistas forestais e en plena noite, pois a única vía asfaltada que conduce ata a Praia do Foxo estaba a ser vixiada por decenas de efectivos da Garda Civil, a Policía Nacional e o Servizo de Vixilancia Aduaneira.
Deste xeito, as Forzas e Corpos de Seguridade do Estado dan un paso máis cara á total desarticulación do armazón criminal que fretou o semisomerxible desde Colombia e que debía atoparse con outra embarcación en altamar, algo que non ocorreu, posiblemente porque a organización tiña coñecemento da presenza policial en toda a costa.
Os testemuños dos dous ecuatorianos que xa están no centro penal da Lama poderían non ser suficientes, pero o relato do representante galego no interior do semisomerxible podería achegar os datos precisos para lograr dar cos seus xefes, que, segundo se sospeita, teñen matriz na comarca do Salnés.
Os tres arrestados foron conducidos a dependencias policiais de Pontevedra, un á Comisaría e dous á Comandancia, onde prestaron declaración antes de ser trasladados a presenza da titular do Xulgado de Primeira Instancia e Instrución 2 de Cangas do Morrazo, encargado de coordinar as actuacións.
Mentres continúan as dilixencias para coñecer con exactitude a pesada da droga intervida (sábese que son 152 fardos de distintos tamaños) e para determinar o modus operandi empregado pola organización. A Policía Nacional ten claro que o batiscafo partiu de Guayana, lugar no que se achan os estaleiros habilitados para a súa construción, e que navegou de Oeste a Este durante máis de vinte xornadas.
