Un detido tras atoparse unha nave con dúas lanchas preparadas para o narcotráfico en Ribeira

Axentes da Policía Nacional adscritos á comisaría de Ribeira detiveron o presunto gardador dunha nave na que o 7 de abril se incautaron dúas lanchas preparadas para o seu uso en operacións de narcotráfico. Atendendo á información divulgada polo corpo, o individuo estaba en paradoiro descoñecido desde que se lle puido vincular coa nave, en Palmeira. 

A construción na que foron localizadas as embarcacións "estaba situada estratexicamente na zona de Palmeira", destaca a Policía, e dispuña dunha rampla con acceso directo á ría de Arousa. Ademais, cada unha das dúas embarcacións "contaba cunha grande adega", engaden as mesmas fontes policiais, e unha delas tiña instalados "dous potentes motores" e á outra podíanselle axustar ata catro de gran cilindrada". 

Os bens intervidos foron valorados en 21.200 euros, puntualiza a Policía Nacional, previo paso á poxa pública. As embarcacións, os motores e demais bens incautados serán poxados xudicialmente, para poder reverter a ganancia económica na loita contra o narcotráfico. 

O detido foi posto a disposición da autoridade xudicial, que lle imputa un delito de branqueo de capitais. A Policía Nacional continúa coas xestións de investigación.