Unha parella, el de 29 anos e ela de 20, foi detida en Vigo pola Policía Local despois de que, por motivos de celos, ambos se agredisen mutuamente en plena rúa. Os feitos producíronse a noite do domingo, sobre as nove, na Avenida de Madrid, segundo informou a Policía Local.
Ao chegar ao lugar, os axentes viron como a parella se estaba empuxando o un ao outro. O home tiña a boca chea de sangue e lesións nunha man, mentres que a muller non parecía estar ferida, pero tiña restos de sangue na boca. Ela recoñeceu que lle deu varias puñadas á súa parella e el corroborou que a agresión fora mutua e que se orixinou por celos. Ambos foron detidos acusados dun delito de violencia de xénero.
