A Consellería de Sanidade prevé investir case 600.000 euros máis na adquisición de novo material para hospitais co fin de abordar a pandemia do covid-19 na Comunidade e a vista posta en que haxa posibles rebrotes.
Diso informou o presidente galego, Alberto Núñez Feijóo, na rolda de prensa posterior ao Consello da Xunta, que aprobou, polo trámite de urxencia, a ampliación da subministración do plan de dotación de equipos para afrontar o covid-19.
Esta nova compra inclúe oito ventiladores volumétricos por valor de 193.600 euros, 5.000 pulsioxímetros cun importe de 195.475 euros, e 201 camas de hospitalización, por valor de 201.898 euros.
Dos oito ventiladores, dous son para o Complexo Hospitalario Universitario da Coruña (Chuac), un para o Complexo Hospitalario Universitario de Santiago (Chus), dous para o Complexo Hospitalario Universitario de Vigo (Chuvi) e tres para o Hospital Universitario Lucus Augusti (Hula).
Das 201 camas, 40 son para o Chuac e 161, para o CHUS, mentres que os pulsioxímetros son para Telea.
Para a compra deste material, Sanidade argumenta que, aínda que actualmente a expansión do virus foise "atenuando", os expertos indican que "non é descartable" un rebrote no próximo outono.
ILLAR A UCI NO HULA
Por outra banda, Sanidade investirá 170.000 euros para mellorar o illamento na UCI do Hospital Universitario Lucus Augusti (Hula).
Para conseguir este obxectivo, vanse a instalar 33 portas automáticas co fin de adaptar os boxes das unidades de coidados intensivos, e de reanimación de adultos para o illamento de pacientes ingresados por covid-19.
