martes. 07.12.2021 |
El tiempo
martes. 07.12.2021
El tiempo

Un descubrimento sobre partículas confirma unha predición feita por físicos galegos hai 25 anos

INSTITUTO GALEGO DE FÍSICA DE ALTAS ENERXÍAS
INSTITUTO GALEGO DE FÍSICA DE ALTAS ENERXÍAS

Este achado pode supor un cambio nos modelos actuais utilizados para explicar a composición e formación dos raios cósmicos

Institucións e universidades americanas e europeas detectaron por primeira vez unhas partículas producidas en colisións nucleares cobre-ouro —no acelerador Relativistic Heavy Ion Collider (RHIC) do Brookhaven National Laboratory (EE UU)— con ata máis dun 50% da enerxía dispoñible nos nucleones (protones e neutróns) dos núcleos atómicos acelerados na colisión. Deste xeito, as partículas producidas son de novo aceleradas. 

Este descubrimento experimental confirma a predición teórica feita fai 25 anos no Instituto Galego de Física de Altas Enerxías (Igfae), centro mixto de investigación da Universidade de Santiago de Compostela e a Xunta de Galicia, polos investigadores Néstor Armesto, Elena G. Ferreiro, Carlos Pajares, Mikhail Braun e Yuly Shabelski (estes dous últimos actualmente na Universidade de San Petersburgo). Os resultados enviáronse á revista Physical Review C e están pendentes de publicación. 

Ata agora, as evidencias foran moi débiles e as incertezas demasiado altas como para validar o modelo teórico predito polos investigadores do Igfae. No entanto, con estas novas medicións, as primeiras en colisións de núcleos tan pesados como o ouro e o cobre, confírmase a predición. 

"As implicacións deste achado poden supor un cambio nos modelos actuais utilizados para explicar a composición e formación dos raios cósmicos, xa que estas partículas ultra enerxéticas poderían formarse na atmosfera", explica Elena G. Ferreiro. 

A investigadora tampouco descarta a posibilidade de que poidan descubrirse novas partículas. Cando hai moitas colisións entre os nucleones dos núcleos atómicos prodúcense efectos entre os seus constituíntes —os quarks— que posibilitan a produción de partículas máis enerxéticas que a que teñen os nucleones individuais, explica a USC nun comunicado. 

Por este motivo, este efecto foi denominado 'QCD accelerator' ou acelerador da Cromodinámica Cuántica (QCD, polas súas siglas en inglés), a teoría que explica a interacción forte ou o comportamento entre os quarks e os gluones. 

Un descubrimento sobre partículas confirma unha predición feita por...
comentarios