Desarticulada unha banda organizada que roubaba en cabinas de peaxe do sur de Pontevedra

O considerado principal responsable do grupo ingresou en prisión
Imagen captada durante uno de los robos. GUARDIA CIVIL
photo_camera Imaxe captada durante un dos roubos. GARDA CIVIL

Dúas persoas de entre 30 e 40 anos foron detidas e outras tres están investigadas pola Garda Civil por integran unha banda organizada que estaba especializada no roubo de cabinas de peaxes na provincia de Pontevedra.

O principal responsable do grupo, que se vincula con once roubos cometidos nos últimos meses, ingresou en prisión por orde do xulgado de instrución número 7 de Vigo.

A investigación da denominada operación Caudasa comezou no pasado mes de xaneiro, cando os axentes do grupo de Patrimonio da Policía Xudicial de Pontevedra identificaron os autores dos roubos rexistrados en cabinas automáticas do sur de Pontevedra.

Todos os integrantes desta banda residen na cidade de Vigo e teñen amplos antecedentes policiais. Cometían os roubos en horas nocturnas, forzando cunha panca as cabinas das peaxes para subtraer a recadación, logo de provocar importantes danos materiais. Para chegar ata as peaxes, segundo informa a Garda Civil, empregaban coches roubados ou placas de matrículas dobradas.

Ás cinco persoas detidas ou investigadas, atribúenselles once roubos en peaxes situados nos municipios de Gondomar, O Porriño e Moaña, cinco roubos de coches e outras cinco placas de matrícula en Vigo e un roubo con forza nun taller mecánico da cidade olívica. Ademais, tamén están investigados por delitos contra a seguridade viaria e falsidade documental.

No rexistro dun dos detidos en Vigo incautáronse útiles para cometer os roubos, pezas vinculadas con estes delitos, diñeiro, teléfonos móbiles, numerosas placas de matrícula, diversa documentación e bastidores de vehículos cortados.