Membros das organizacións de Vía Campesiña de toda Europa denunciaron a "invisibilidade" e a "contorna hostil" que sofre o colectivo LGTBIQ no rural, no primeiro encontro europeo que aglutina a este colectivo, co fin de pór solucións e difundir a diversidade de xénero.
Paula Gioia, membro da Executiva da Coordinadora europea da Vía Campesiña e da Executiva da organización a nivel internacional, o activista Ángel Amaro e a secretaria xeral do Sindicato Labrego Galego (SLG), Isabel Vilalba, foron os encargados de presentar o evento, que comezou o xoves 15 e prolongarase ata o sábado 17.
As organizacións sociais temos que abrir todos os armarios. Non podemos lexitimar ningún tipo de opresión
Tal e como explicou Ángel Amaro, as xornadas teñen un dobre obxectivo. Por unha banda, ver "como articular unha soberanía integral, social, sexual e nacional" de modo que se atopen metodoloxías que "integren a todos" e, por outro, tratar de lograr "unha emancipación intersectorial que fale ao mesmo tempo de clase sexual, sexualidade e defensa da cultura galega".
Amaro denunciou a existencia dunha serie de violencias "sistémicas", e sinalou o "capitalismo, fascismo, ruralfobia, estereotipos sobre rural e LGTB, consumismo e globalización".
O activista aproveitou para recordar o traballo de persoas como Daniela Ferrández (presidenta de Amizando), Ximena González (Marcha Mundial de Mulleres) e Laura Bugallo, un "referente máxima en Galicia", porque "permite ter feedback entre as activistas dos movementos".
O encontro concluirá cun magosto na tarde do sábado en Compostela
Durante estas xornadas están a predominar as dinámicas de grupo, con debates e coloquios que permiten intercambiar experiencias e o coñecemento de como é a realidade LGTBI e labriega en diferentes países. A elas acudiron integrantes das organizacións de Vía Campesiña de toda España e Europa, procedentes de Andalucía, País Vasco, Alemaña, Austria, Bélxica, Noruega e Gran Bretaña teñen a oportunidade de compartir as súas experiencias.
SUMAR NOVOS MEMBROS. Nestas sesións analízase como se poden crear discursos e estratexias, estúdanse novas sinerxías entre movementos e plans de acción do colectivo LGTBI. "Esperamos que neste encontro salgan boas prácticas e técnicas", expresou o activista.
Ademais, a campesiña brasileira Paula Gioia, unha das activistas con máis protagonismo no impulso das iniciativas en materia de diversidade de xénero nos últimos catro anos en Europa, engadiu que estas xornadas permiten "sumar novos membros que estaban silenciados e manter aos que xa temos".
Gioia destacou a importancia do individuo "como peza fundamental para a construción dun movemento social", e subliñou que en Vía Campesiña teñen cabida todas as diversidades sexuais.
LOITAR CONTRA O "PATRIARCADO". A secretaria xeral do Sindicato Labrego, Isabel Vilalba, sinalou que a loita contra o patriarcado é "esencial, tanto como a defensa dos dereitos do campesiño" porque "ten que ver cunha cuestión esencial, a propia vida". Vilalba recordou que a diversidade sexual provoca situacións de "invisibilidade" e unha "contorna hostil", e que "as mulleres e persoas con identidades distintas son subsidiarias e foco de violencia de múltiples estilos".
A secretaria xeral do sindicato valorou positivamente os avances na visibilidade do colectivo LGTB tanto en zonas urbanas como no rural, a pesar das diferenzas de valores entre ambos e repetiu unha cita que utilizara en reunións anteriores: "As organizacións sociais temos que abrir todos os armarios. Non podemos lexitimar ningún tipo de opresión".
Así, persoas de toda Europa reúnense estes días en Santiago, no Centro de Interpretación Ambiental de Compostela. As paredes están repletas de cartolinas con frases, ideas e proxectos froito das primeiras sesións. Na tarde do sábado, cun magosto, concluirá un primeiro encontro que busca "un gran cambio social para toda a cidadanía".
