Galicia
O 8-M reinvéntase en Lugo
A Delegación do Goberno en Galicia recibiu a comunicación da celebración de 88 concentracións e manifestacións con motivo do Día Internacional da Muller, o 8 de marzo. Destes actos, 21 están previstos na provincia de Lugo.
Atendendo aos datos achegados a Europa Press, a provincia da Coruña acollería 34 eventos deste tipo, mentres que a de Pontevedra rexistra un total de 26 convocatorias e na de Ourense hai só sete actos comunicados.
O conselleiro de Sanidade, Julio García Comesaña, confirmou este venres que a resposta que se lle dá á Delegación do Goberno ante a comunicación dunha concentración ou manifestación "é a que se dá sempre" para calquera tipo de evento neste momento de pandemia e restricións derivadas do coronavirus.
► Máis información: O 8-M se reinventa en Lugo
"Temos unhas condicións, para as concentracións, e son as mesmas que demos tamén hai unhas semanas para a duns negacionistas diante do Parlamento", explicou a preguntas dos medios, no medio da polémica xerada pola decisión da Delegación do Goberno en Madrid de non permitir os actos do 8-M nesa comunidade.
Comesaña sinalou que os argumentos que dan á Delegación, como autoridade competente en seguridade cidadá, baséanse en que se fagan cumprir esas condicións. "Se son capaces de mantelas e de que todo o mundo cumpra esas condicións, nós non podemos opoñernos", manifestou. Por iso, explicou que o que fixeron as xefaturas territoriais é "dar as condicións" para a celebración destes eventos.
A Xunta, como autoridade competente delegada en materia sanitaria no estado de alarma, só pediu por escrito, ante manifestacións ou concentracións —incluídas as do 8 de marzo—, que se fagan respectar as medidas de prevención para a contención do covid-19. Nesa resposta estándar, as xefaturas territoriais informan de que as medidas sanitarias son a "garantía" de cumprimento da distancia de seguridade en todo momento e que non se formen "aglomeracións", xunto co uso da máscara.
