Galicia foi este luns a gran triunfadora, xunto con Cataluña, no día das estrelas Michelin. Por primeira vez, un restaurante galego foi distinguido con dúas estrelas, unha honra que correspondeu a Culler de Pau, o restaurante que o chef Javier Olleros ten no lugar de Reboredo, no Grove.
Olleros non só cociña o mundo vexetal e mariño da súa contorna, senón que traballa con produtores para recuperar especies a través de dúas hortas. Del, os inspectores da Guía Michelin destacaron o seu "sentimento ambiental".
Olleros defínea como "unha cociña limpa, comprometida, saborosa, moi galega e sa, honesta, con sentimento, razoada pero moi intuitiva". Ademais, o chef quixo recordar que as dúas estrelas Michelin tamén é un recoñecemento aos seus provedores.
Ademais do triunfo de Culler de Pau, Galicia incorporou outras tres estrelas Michelin, ás once que xa tiña. Trátase de Eirado da Leña, en Pontevedra; Silabario, en Vigo, e Miguel González, en Pereiro de Aguiar (Ourense).
A felicidade, no entanto, non foi completa: Lugo continúa como a única provincia galega que nunca colocou unha pica na Guía Michelin. Este ano, tampouco puido ser.
Como non foi tampouco "a gran festa da gastronomía" que reunía os mellores cociñeiros de España e Portugal debido á pandemia. No entanto, Michelin fixo que interviñesen desde as súas casas ou restaurantes os tres que recibiron a segunda estrela —ademais de Culler de Pau, son Bo.TiC (Corçà, Xirona) e Cinc Sentits (Barcelona)— así como os once que manteñen as tres.
Eirado da LeñaO chef Iñaki Bretal consegue a súa primeira estrela Michelin co seu restaurante, que está situado na céntrica Praza da Leña de Pontevedra.
SilabarioDesde a súa actual localización en Vigo, Alberto González recupera a estrela Michelin que conseguira co restaurante cando este se atopaba en Tui.
Miguel GonzálezO chef Miguel González consegue a súa primeira estrela Michelin coa vangardista cociña que practica no restaurante que posúe na Morteira, en Pereiro de Aguiar.
Yayo DaportaYayo Daporta xa é un clásico na Guía Michelin. O seu restaurante situado en Cambados continúa un ano máis na lista.
Casa SollaPepe Solla, co seu restaurante na avenida de Sineiro, en San Salvador de Poio, mantén unha clientela fiel ao seu menú con estrela.
Pepe VieiraDesde hai doce anos, Pepe Vieira mantén a súa estrela Michelin co restaurante que posúe en Camiño da Serpe, en Raxó, tamén en Poio.
Maruja LimónO chef lucense Rafa Centeno conseguiu manter na elite o seu coqueto restaurante Maruja Limón, situado en Montero Ríos, 4, en Vigo.
Árbore da VeiraLuis Veira erixiuse nun dos cociñeiros galegos máis talentosos desde o seu espectacular restaurante no monte San Pedro, na Coruña.
NovaAta agora, o restaurante Nova era o único con estrela Michelin en Ourense coa súa proposta de cociña "con raíces".
As GarzasO chef Fernando Agrasar continúa á fronte do restaurante As Garzas en Porto Barizo, en Malpica. Un local que xa é tamén un clásico na Guía Michelin.
Casa MarceloO chef Marcelo Tejedor, un veterano nas lides da guía francesa, mantén o seu idilio coas estrelas Michelin logo de idas e voltas. Agora triunfa con Casa Marcelo, na Rúa das Hortas (Santiago).
Retiro da CostiñaSituado no municipio coruñés de Santa Corda, o Retiro da Costiña continúa un ano máis cunha estrela Michelin máis que consolidada polo bo facer do chef Manuel Costiña.
A TafonaA chef Lucía Freitas é a única muller á fronte dun restaurante con estrela Michelin en Galicia. Trátase da Tafona, situado na Rúa da Virxe da Cerca, en Santiago.
