A Coruña renomeará este xoves a rúa Juan Canalejo e recuperará para ela a tradicional denominación de Socorro, en cumprimento da Lei de Memoria Histórica, un acto que será arroupado pola tarde por outras actividades enmarcadas na mesma temática.
Ao acto do descubrimento da nova placa, previsto ás 19.00 horas na praza de la Fuente Luisa, asistirán o alcalde da Coruña, Xulio Ferreiro; a edil de Xustiza Social e Coidados, Silvia Cameán, e o presidente da Cociña Económica, Alberto Martí, informan fontes municipais.
Seguidamente e neste mesmo contexto presentarase no Fórum Metropolitano o ciclo de cine Primavera da memoria, formado por catro mostras documentais sobre a Guerra Civil e as súas consecuencias, e o blogue Memoria do cárcere na Casa Museo Casares Quiroga.
Esta páxina, promovida pola Asociación para a Recuperación da Memoria Histórica (ARMH) e Proxecto Cárcere, mostra a intrahistoria da antiga prisión provincial coruñesa a través de materiais audiovisuais e narracións de quen foron recluídos nas instalacións, así como dos seus achegados.
Polos muros deste cárcere pasaron representantes municipais, sindicais, veciñais e "moitos deles foron fusilados, agarrotados ou feitos desaparecer", sostén a ARMH, que recorda que, "desde o inicio do golpe de estado de 1936 ata o último momento do franquismo, homes e mulleres foron presos só por ter cargos ou apoiar as ideas republicanas".
Este blogue pretende contar estas historias para "honrar a memoria e abrir as portas contra o silencio".
Para iso divídese en varios apartados, entre eles o relativo a Aspectos e Reseñas, onde se conta a vida dos presos; Día a día no cárcere, sobre a vida diaria; Feito no cárcere, sobre a produción realizada intramuros, O edificio, que describe as distintas estancias; Escritos, con obras feitas ao redor da prisión; Colaboracións e Na ficción.
