Un control de alcoholemia realizado polo destacamento da agrupación de tráfico da Garda Civil acabou sorprendendo aos propios axentes ao exceder o condutor os límites de medida do etilómetro. E iso a pesar da hora á que se lle practicou a proba: as 12.16 do mediodía.
O infractor, multirreincidente, foi parado á altura do quilómetro 08,500 da estrada AC-223, no concello de Mesía. Segundo indica a Benemérita nun comunicado, o home dixo aos gardas civís "que viña da fonte de coller auga fresquita".
Ao realizarlle a proba, foilles imposible determinar a taxa de alcol, xa que superaba os máximos que recolle o dispositivo de aproximación que utilizan as patrullas de estrada. Así, solicitaron a presenza dun vehículo dotado de etilómetro de precisión para a súa realización.
O individuo xa fora sorprendido en xullo de 2018 e xaneiro de 2019 conducindo cunha taxa de alcol superior á permitida. O instituto armado considera que ten un problema de adicción ao alcol, polo que o propuxo para unha revisión psicofísica extraordinaria.