jueves. 04.03.2021 |
El tiempo
jueves. 04.03.2021
El tiempo

Condenan o Sergas a indemnizar a un paciente que sufriu unha gangrena tras unha vasectomía

Exterior del Hospital do Salnés. GOOGLE MAPS
Exterior do Hospital do Salnés. GOOGLE MAPS
A operación realizouse no Hospital do Salnés e a vítima terá que recibir 25.000 euros

O xulgado do Contencioso Administrativo 1 de Santiago de Compostela condenou ao Sergas e á súa aseguradora a indemnizar en 25.000 euros a un paciente que sufriu unha gangrena de Fournier, unha grave infección necrotizante que afecta aos xenitais, tras someterse a unha vasectomía no Hospital do Salnés, en Vilagarcía. 

Segundo a sentenza, á que tivo acceso Europa Press, este paciente, de 35 anos de idade, foi sometido á intervención o 4 de marzo de 2015. Dous días despois acudiu a Urxencias por presentar dor inguinal e sangue nos ouriños, e diagnosticóuselle un hematoma, para o que lle prescribiron antiinflamatorios e antibióticos. 

O home quedou ingresado, pero a súa situación empeorou e o 8 de marzo foi trasladado ao Hospital de Pontevedra, onde tivo que ser intervido en dúas ocasións por presentar unha gangrena de Fournier. Posteriormente, debido ás secuelas das intervencións, tivo que ser novamente operado, nese caso no servizo de cirurxía plástica do CHUS. 

O paciente, representado polo avogado Cipriano Castreje, presentou reclamación ante o Sergas por considerar que non se lle informou adecuadamente dos riscos da intervención, así como polos danos físicos e psicolóxicos derivados dun diagnóstico tardío e un incorrecto tratamento inicial. 

O Sergas estimou parcialmente a reclamación e determinou unha indemnización de 9.000 euros, pero o despacho de Castreje presentou recurso contencioso e un xulgado de Santiago estimouno parcialmente, aumentado a indemnización ata os 25.000 euros. 

Na súa sentenza, o xulgado sinala que a información achegada ao paciente sobre os riscos da vasectomía foi "excesivamente concisa" e que, aínda que a gangrena de Fournier é unha complicación pouco frecuente, o consentimento informado que asinou o paciente só recollía o risco de posible hematoma ou inflamación. 

Por outra banda, aínda que non considera acreditado que se rompeu o protocolo de asepsia por parte do Hospital do Salnés, si sinala que, na primeira visita a Urxencias, debería terse feito unha ecografía e unha drenaxe cirúrxica, polo que se produciu unha perda de oportunidade que debe ser indemnizada". 

Por todo iso estimou parcialmente o recurso e fallou que a indemnización que deben abonar o Sergas e a súa aseguradora debe ascender a 25.000 euros. Contra esta resolución cabe interpor recurso de apelación. 

Condenan o Sergas a indemnizar a un paciente que sufriu unha...