Un home foi condenado a tres anos e cinco meses de prisión por botar cocaína e MDMA na bebida de dúas prostitutas que se desprazaron á súa vivenda en Serra de Outes.
A sentenza da sección sexta da Audiencia Provincial da Coruña, emitida o pasado 28 de setembro e remitida aos medios de comunicación, condena a este home como autor dun delito contra a saúde pública "de sustancia que causa grave dano á saúde".
Os maxistrados consideran probado que o acusado acudiu ao club Máxima, na localidade de Bertamiráns e alí contratou os servizos das prostitutas, coas que acordou ir ao seu domicilio en Serra de Outes.
Unha vez no domicilio, preparou un bebida tipo cóctel, na que previamente disolvera cocaína e MDMA, e forneceulla ás dúas mulleres.
Unha delas empezou a sentirse mal, a ver borroso e sentir mareos con perda de visión, polo que posteriormente sufriu un trastorno de tensión postraumática.
A outra muller tamén sufriu a mesma reacción adversa, aínda que ao vomitar inmediatamente logo de inxerir a bebida, os seus síntomas e os efectos foron menores.
Os maxistrados tamén impuxeron ao condenado a prohibición de aproximarse e comunicarse coas vítimas durante dous anos, así como o abono dunha indemnización de 3.000 euros á prexudicada que padeceu máis danos e de 600 euros á outra denunciante.
Contra a sentenza pódese presentar recurso de casación ante o Tribunal Supremo.
