Sete anos e medio para Marino Giménez polo roubo aos narcos

A Audiencia de Pontevedra condenou con penas de que van desde os 4 ata os 7 anos e medio de prisión a cinco persoas, entre elas Marino Giménez, do clan dos Morones, e a un axente da Garda Civil, por planear o roubo dunha partida de cocaína a uns narcotraficantes.

A Audiencia tamén condenou a un dos narcos vítima da tentativa de roubo, perpetrada nunha gasolineira de Mos, que finalmente frustrou a Policía Nacional.

A Sala considera probado que a intención dos acusados era aproveitarse da condición de garda civil de Enrique P.M. para apoderarse da sustancia estupefaciente.

Este axente, expón o tribunal na súa sentenza, simulou un control nunha estrada da localidade pontevedresa de Mos para poder interceptar aos vendedores e subtraer a droga.

Entre os condenados atópase Marino Giménez, membro do clan dos Morones e irmán de Sinaí Giménez, autoproclamado príncipe dos xitanos galegos.

Foi condenado a 5 anos e 6 meses de prisión por un delito de tráfico de drogas e a 2 anos de prisión por un delito de tenencia ilícita de armas, ademais dunha multa de 90.000 euros.

Ao axente da Garda Civil, Enrique P.M., impuxéronlle unha pena de 7 anos de prisión por un delito de tráfico de drogas agravado pola súa condición de funcionario público, e unha multa de 113.000 euros.

Ademais, foi inhabilitado para o exercicio do seu cargo durante 15 anos.

Outro dos acusados, Marcos G.B., foi condenado a 5 anos e medio de prisión como autor dun delito de tráfico de drogas e ao pago dunha multa de 90.000 euros; mentres que Alfonso P.C. e Alfredo I.G. foron condenados, cada un, a 4 anos de cárcere polo mesmo delito e a facer fronte a unha multa de 60.000 euros.

Unha das vítimas do asalto, Benito O.O., foi absolto de todos os delitos, mentres que o outro, Modesto D.A., foi condenado a 5 anos de prisión por un delito de tráfico de drogas coa circunstancia agravante de reincidencia, e ao pago dunha multa de 90.000 euros.

Os cinco primeiros foron absoltos do delito de integración criminal do que estaban acusados.

A sentenza non é firme e contra a mesma cabe interpor recurso de casación ante a Sala Segunda do Tribunal Supremo.