O servizo de Uroloxía do Complexo Hospitalario Universitario da Coruña (Chuac) desenvolveu unha técnica para o tratamento cirúrxico de tumores e patoloxía do ril e a glándula suprarrenal que é única en España e suscitou xa o interese de médicos de varios países.
Esta técnica realízase en quirófano mediante videocirurxía e desde o exterior do corpo a través dunha soa incisión ou porto único de tan só tres centímetros, sen entrar na cavidade abdominal empregando unha cámara e instrumental específico.
"É unha técnica complexa, minimamente invasiva, xa que accedemos directamente ao compartimento renal mediante retroperitoneoscopia; iso en condicións normais é unha cavidade que non existe, é un espazo virtual, hai que xeralo e facémolo con gas para evitar meternos na cavidade abdominal e danar outros órganos", explica nunha entrevista con Efe o urólogo Darío Vázquez Martul.
Vázquez Martul (A Coruña, 1984) é médico adxunto do servizo de Uroloxía do Chuac, dirixido polo doutor Venancio Chantada, unha das unidades de uroloxía a nivel estatal cunha das carteiras de servizos máis amplas en cirurxía minimamente invasiva, parte delas defendidas e premiadas este mes no Congreso Nacional de Uroloxía.
Cando se practica unha laparoscopia mobilízase o intestino, o fígado ás veces, pero con esta abordaxe "non fai falta", detalla o urólogo coruñés, de maneira que "non se xeran despois fibroses ou adherencias, é unha vantaxe", resume.
O Chuac fixo ata o momento unhas 25 intervencións deste tipo, polas que xa se interesaron profesionais doutros países
A incisión realízase nun costado do paciente e, con material específico, unha cámara e unhas pinzas curvas, opérase por esa única incisión, pola que se extraen tumores suprarrenais de ata oito centímetros. Incluso operou e extraeu un ril con múltiples tumores por unha incisión de menos de catro centímetros.
O Chuac fixo ata o momento unhas 25 intervencións de abordaxe mediante retroperitoneoscopia cunha única incisión. "A nivel nacional somos o único hospital que o fai", subliña o urólogo. "E extirpar só o tumor preservando o resto do ril somos o único hospital de Europa que o fai", abunda o doutor Vázquez Martul, quen destaca que a maioría de pacientes recibe a alta en menos de 24 horas cun posoperatorio practicamente sen dor.
Por iso recibiu peticións de compañeiros doutros países europeos, tamén de México, para interesarse por esta técnica e iniciarse nela. "De momento, polo covid, non puidemos ir, pero o interese existe", sinala.
A única limitación neste tipo de cirurxías é o
"En España non se fai en máis centros pola complexidade", abunda o urólogo, que realiza todas as intervencións unicamente cun asistente. "A complexidade é a pericia e habilidade do cirurxián para realizar a cirurxía", di.
Vázquez Martul prevé que en dous ou tres anos aterrarán en Europa novas plataformas robóticas de porto único, que de momento só se empregan en Estados Unidos, e xeneralizaranse entre os cirurxiáns. "De momento a técnica aquí como tal é cirurxián-dependente", conclúe.
