Máis dun centenar de estudantes da Universidade de Santiago de Compostela (USC) concentráronse este xoves ante o reitorado, na Praza do Obradoiro, para reclamar a dimisión e inhabilitación total do profesor Luciano Méndez, ao que unha alumna denunciou por machismo.
O docente da Facultade de Económicas foi suspendido de forma cautelar do seu cargo debido á queixa que presentou Carmen Carballido, na que conta que o educador se mofara seu escote durante unha clase.
Menos de vinte e catro horas despois da presentación desta protesta, o reitor Antonio López anunciaba a suspensión cautelar do docente, medida que os alumnos ven insuficiente, e por iso esixen a súa dimisión. "Non é suspensión, é dimisión", corearon as decenas de alumnos que se concentraron fronte á catedral a pesar das intensas precipitacións.
"Luciano, machista, estás na nosa lista", "Fóra machistas da USC" e "Aquí está, aquí se ve, o feminismo galego en pé" foron outras das proclamas pronunciadas polos estudantes durante a concentración.
No acto reivindicativo participou tamén Carmen Carballido, vítima das presuntas vexacións verbais por parte do docente, e pediu que Luciano Méndez non volva dar clase na institución académica. "Dáme bastante medo que volva", porque tería que volver ser o seu profesor no seguinte curso, detallou a alumna.
Por iso confiou en que o reitor "se tome en serio" este asunto e impida a volta de Luciano Méndez ás aulas.