A Federación de Ensino de CC OO reclamou este mércores á Consellería de Educación a posta en marcha de comisións ou grupos de traballo, con participación sindical, para "planificar e organizar con tempo" a volta ás aulas o próximo curso en canto a protocolos e medidas de protección contra a covid-19. Así o explicou, en rolda de prensa, a secretaria xeral desta federación, Luz López, que recordou que este regreso se producirá en circunstancias "especiais", polo que "non se pode organizar como un setembro calquera".
López admitiu que a pandemia foi unha circunstancia "sobrevinda", o que non permitiu planificar con tempo algunhas cuestións. Con todo, explicou, entre agora e o reinicio do curso en setembro "si hai tempo" para o "establecemento de protocolos de actuación" cos que facer o regreso a clases máis seguro.
Para a responsable de CC OO Ensino, a Xunta debería facer xa durante estes meses "a avaliación de riscos laborais de cada centro", así como de cada posto de traballo, algo que, recordou, efectuouse nos colexios electorais.
José Fuentes: "Queren facer unha volta ás aulas a custo cero, e iso non é posible"
O sindicato valorou que o documento emitido polo Ministerio de Educación "priorice a presencialidade nas aulas" para o próximo curso, aínda que advertiu de que "non se pode planificar un só escenario", se non que os protocolos deben ir orientados á posibilidade de que haxa que combinar o ensino presencial coa telemática ou, "no peor dos casos", optar só pola telemática.
"Pedimos que se traballe con tempo e que toda a comunidade educativa debería ter coñecemento con antelación sobre como se van organizar", resolveu.
PROTOCOLOS DE ACCESO, LIMPEZA OU EPIS. Na mesma liña, o delegado de Acción Sindical, José Fuentes, admitiu que "é desexable que o ensino sexa presencial", aínda que, advertiu, non se coñece "cal vai ser a situación de saúde pública no mes de setembro", polo que é necesario abrir a planificación a varios escenarios. Entre outras cuestións, pediu a conformación de protocolos de desinfección central dos centros ou que se debata a redución de cocientes de alumnos por aula se é necesaria unha separación de 1,5 metros entre eles. "Queren facer unha volta ás aulas a custo cero, e iso non é posible", resolveu.
O sindicato pediu un plan de dotación de medios informáticos para os alumnos, a través de préstamo, e un plan de formación do profesorado neste tipo de metodoloxía
Por outra banda, CC OO reclamou que a distribución de elementos de protección para os traballadores sexa "centralizada". "Non se pode trasladar aos centros a responsabilidade de dotarse e almacenar elementos de protección", dixo José Fuentes, que pediu que sexa a propia administración educativa a que se encargue. Do mesmo xeito, instou a definir "que espazos se van a utilizar", recordando que a aposta por zonas exteriores é de difícil aplicación en Galicia chegado o outono e o inverno.
Por outra banda, chamou a atención sobre a creación de protocolos de acceso aos centros, adecuados ás características de cada colexio, pautas de desinfección e higienización de cada espazo e medidas especiais para persoas "en situación de vulnerabilidade".
Finalmente, e ante a posibilidade de que un rebrote obrigue a apostar de novo pola formación online, o sindicato pediu un plan de dotación de medios informáticos para os alumnos, a través de préstamo, e un plan de formación do profesorado neste tipo de metodoloxía, así como a regulación da xornada tanto de docentes como de alumnos en teleformación.
