A directora xeral de Saúde Pública, Carmen Durán, avanzou o pasado 22 de setembro que o Sergas trataría de localizar os 160.757 galegos que non figuraban como vacinados contra o covid, un labor na que tamén se determinaría se había galegos que recibiran o fármaco pero non figuraban nos rexistros por facelo noutro territorio.
Desde entón, da análise dos datos que publica diariamente o Ministerio de Sanidade despréndese que uns 20.897 galegos vacináronse por primeira vez desde esa data. Deles, 5.250 están na franxa de idade de entre 30 e 39 anos, a que presenta o índice de vacinación máis baixo de Galicia.
En rigor, son 28.288 galegos os que recibiron a primeira dose nese período, pero a esa cifra restáronselle os 7.391 correspondentes ao grupo que ten entre 12 e 19. Aínda que a trasposición non é exacta —non se publican as cifras co detalle ano a ano dos vacinados—, os menores de 12 anos fóronse vacinando conforme foron cumprindo esa idade.
A Consellería de Sanidade non deu cifras oficiais do número de persoas que rexeitaron a vacina nalgunha ocasión e que accederon agora a recibir a picada.
Un 17% das persoas de entre 30 e 39 anos aínda non recibiron o fármaco
Así as cousas, o informe do Ministerio de Sanidade do 23 de setembro —con datos do día 22— reflectía que 2.294.534 galegos recibiran unha primeira dose. No último informe —do 7 de decembro, con datos do día anterior— contabilízanse 2.322.822 galegos nesta situación, 28.288 máis. Destes, 20.897 son maiores de 20 anos, case un 13% dos 160.757 que se propuxo buscar o Sergas o 22 de setembro.
POR FRANXAS DE IDADE. Do informe do Ministerio de Sanidade despréndese tamén que se vacinaron todos os maiores de 70 anos. Na franxa de idade de entre 60 e 69 recibiron a pauta completa o 99,6% dos galegos.
No resto de grupos producíronse incrementos de primeiras doses durante este período, o que implica a incorporación de galegos á vacinación. En todo caso, a franxa de idade de 30 a 39 anos segue pouco por enriba do 82% en primeiras doses. Ou dito doutro xeito, máis dun 17% non recibiu ningunha picada.
Concretamente, as primeiras doses que se puxeron desde o 22 de setembro foron as seguintes: 2.030 do grupo 60-69; 2.485 do grupo 50 a 59; 4.093 na franxa de 40 a 49 anos; 5.250 no grupo de 30 a 39 anos, e 5.802 no grupo 20 a 29 anos.
Máis da metade dos 5.800 mozos de 20 a 29 anos que se vacinaron desde outubro sumáronse tras esixir pubs e discotecas o certificado
CERTIFICADO COVID. Desde finais de outubro, en Galicia esíxese o certificado covid no lecer nocturno e a finais de novembro estendeuse o requisito á hostalería —aos restaurantes durante todo o día e ás cafeterías, bares e tascas a partir das 21.00 horas—. E iso pode ser un aliciente para que se vacine quen aínda non o fixese. Máis da metade dos 5.800 mozos de 20 a 29 anos que recibiron o fármaco desde outubro fixérono despois de que pubs e discotecas comezasen a pedir o pasaporte.
A propia Dirección Xeral de Sáude Pública inclúe nos informes que remite ao Tribunal Superior de Xustiza de Galicia (TSXG) que a incorporación do certificado covid para acudir aos establecementos de hostalería supón un incentivo para a inmunización, sobre todo, dos colectivos con menor índice de vacinación que, á súa vez, son os máis susceptibles de acudir aos locais de lecer nocturno.
