Carmen Avendaño, presidenta da asociación Érguete, despediu a Abel, un dos seus cinco fillos, falecido aos 50 anos tras non poder superar unha longa enfermidade, segundo informou a organización nun comunicado.
"Levaba tempo enfermo, pero como a súa nai, nunca deixou de loitar", sinala na nota Érguete, entidade que traballa pola plena incorporación á sociedade das persoas que tiveron problemas de drogodependencia.
"Estamos profundamente afectados por esta situación, el creceu da man da asociación, como cada un dos fillos de Carmen. Perdemos a un compañeiro, un exemplo de superación para nós", continúa a nota.
Na cal se engade: "pero a vida é así, e máis nestes tempos".
Agora, conclúe a mensaxe, quedan os recordos e as ganas de loitar polo soño que compartía Abel con Carmen: unha sociedade mellor, máis xusta e con máis oportunidades.
"Grazas por todo Abel. Sempre na nosa memoria e o noso traballo", é a despedida.
