Cae o tráfico de pasaxeiros Santiago de Compostela e Vigo e crece na Coruña

O tráfico de pasaxeiros caeu en novembro un 2,1% no aeroporto de Santiago de Compostela e un 9,8% no de Vigo, e só o da Coruña sae airoso na comparativa co mesmo mes de 2012, ao crecer neste apartado nun 15%, segundo recollen as estatísticas de Aena.

Lavacolla contabilizou en novembro 135.021 pasaxeiros e no acumulado do ano totaliza 1.936.838, o que supón un descenso do 5,1% respecto ao mesmo período do ano anterior; por Alvedro pasaron 80.013 pasaxeiros para un total de 762.931 (-3,6%); e por Peinador, 40.025 para un total de 630.014 (-18,6%).

En canto ao número de operacións en novembro, só caeron en Santiago (-6,4%), mentres que na Coruña e Vigo aumentaron, respectivamente, nun 21,5% e un 12,2%.

Con todo, a terminal de Lavacolla é a única que creceu o pasado mes no tráfico de mercancías, concretamente un 14,6% (165.057); mentres que na Coruña caeron un 86,8% e en Vigo, un 35,2%, na liña coa tendencia descendente de todo o ano.

Comentarios