O alcalde de Vigo e presidente da Federación Española de Municipios e Provincias (FEMP), Abel Caballero, descartou á presidenta da Deputación de Pontevedra, Carmela Silva, como candidata do PSdeG á Presidencia da Xunta ao considerar que "cando un está nun lugar" debe "asentarse".
Carmela Silva "sería unha moi boa opción para Galicia, España ou para Europa pero este non é o caso", asegurou nunha entrevista concedida á Cadea Ser na que se mostrou partidario de "asentarse". "Eu son alcalde de Vigo, levo nove anos e non me movo de aquí nin con lanzachamas", manifestou.
Na súa intervención, o rexedor apostou por manterse á marxe da xestora que decidirá o futuro do PSdeG e asegurou que se negou a formar parte dese órgano do mesmo xeito que tampouco quixo formar parte da executiva presidida polo exsecretario xeral, José Ramón Gómez Besteiro.
Sobre esta cuestión, Caballero tamén considerou que o papel da xestora é meramente orgánico e "non político" e que, entre todos, terán que elixir ao candidato socialista á Presidencia da Xunta en primarias. Todo iso, sen présas, ao insistir en que "é moi importante que o PSOE dosifique ben os seus tempos".
Ademais, o alcalde de Vigo ve ao alcance do PSOE a posibilidade de gobernar dado "a deterioración de Feijóo". "Feijóo está a mostrar aburrimento de Galicia porque non quere seguir aquí", asegurou antes de considerar que vai ser "un candidato feble" pola súa "debilidade" derivada dunha xestión "deficiente e frouxa".