O líder do PSdeG, Gonzalo Caballero, desprazouse este venres ao Porto invitado polo primeiro ministro e candidato socialista, António Costa, para participar no peche de campaña do PS para as eleccións lexislativas de domingo.
O líder dos socialistas galegos arroupou así a Costa no último mitin dunha campaña na que parte como favorito. Caballero erixiu a Costa en "referencia" dentro da socialdemocracia europea, pola súa aposta no Goberno luso pola "prosperidade económica" sen perder de vista "a xustiza social".
"O seu Goberno demostrou desde 2015 como os socialistas sabemos promover o desenvolvemento económico combinado coa prioridade social e a loita pola igualdade", sinalou o vigués.
