Un gromo vinculado a un local de hostalería en Lalín deixa por agora 15 positivos, segundo informou este mércores a área sanitaria de Santiago. Na capital dezana xa se rexistraban oito casos activos coa residencia DomusVi.
GROMO NO MULTIUSOS DO SAR. Os casos positivos de Covid-19 vinculados ao gromo detectado no Multiusos Fontes do Sar de Santiago de Compostela son xa 30, segundo informaron este mércores fontes da área sanitaria.
Este martes tíñase coñecemento dun brote vinculado ao Multiusos compostelán, que naquel momento afectaba a nove persoas. Por mor da información de que afectados por Covid-19 pasaran polas instalacións, o centro realizou unha desinfección xeral e cancelou as actividades dirixidas ata novo aviso.
Con todo, o rastrexo de contactos destes primeiros positivos derivou, polo momento, na detección de 30 casos relacionados.
Segundo informaron a Europa Press fontes do Multiusos, tras detectar inicialmente os casos positivos de dous traballadores, desde o centro facilitáronse ás autoridades sanitarias os nomes de 60 posibles contactos, que agora se ampliarán no período de rastrexo. Solicitouse tamén que se faga PCR a todos os traballadores do centro de forma preventiva.
Ante a evolución epidemiolóxica en Santiago, e tendo en conta que este brote afectaba a un ximnasio, a Consellería de Sanidade decidiu este mércores estender tamén ao concello da capital as medidas de restrición xa vixentes noutras áreas, como A Coruña e Lugo, con limitación de aforamentos e reunións ou o peche de visitas a residencias. Nos ximnasios será obrigatorio o uso de máscara.
