O portavoz nacional do BNG, Xavier Vence, reiterou que "hai un diálogo aberto" para que outras forzas políticas se unan á plataforma Iniciativa pola Unión (IXU) para construír "esa alternativa potente que Galicia necesita" cara ás próximas eleccións xerais. Esta plataforma, segundo Vence, está composta por "moita xente independente e moitas outras forzas políticas" manifestando a súa esperanza de aumentar o seu número nas próximas semanas.
Tamén destacou a importancia de contar cun "grupo propio" no Congreso que defenda "os intereses deste país e dos seus sectores produtivos potentes e dinámicos". A candidatura unitaria que o BNG trata de impulsar xunto a outras formacións e, sobre todo, de "moita cidadanía", atópase nestes momentos "en fase de sumar", dixo o líder do BNG.
Preguntado sobre unha posible confluencia con grupos como Anova, Esquerda Unida ou as Mareas, dixo que a súa formación está na plataforma Iniciativa pola Unión "con todas as forzas que se están incorporando aí" e mantendo o "diálogo aberto" para que outras se somen a esta "candidatura de amplo espectro".
Estas declaracións, que o líder nacionalista fixo nunha visita á feira Conxemar en Vigo, prodúcense un día despois de que insistise que os pazos para formar tal candidatura están a acurtarse e criticase o entendemento entre Anova e Podemos.
