O BNG denuncia "actitude chafalleira e oscurantista" do Goberno galego mentres ao PSDEG úrxelle un plan de axudas á hostalería tras o auto do Tribunal Superior de Xustiza de Galicia (TSXG) que inhabilita a obrigatoriedade de solicitar o certificado covid para acceder ao interior de locais.
Para o deputado do Bloque Luís Bará resulta "un fracaso" que o Goberno de Alberto Núñez Feijóo non solicitase autorización xudicial para unha medida restritiva de dereitos fundamentais, proceder que o TSXG considerou "anómalo". Por iso, esixe explicacións e responsabilidades e urxe a convocatoria da deputación permanente para celebrar un pleno extraordinario no que Feijóo "dea a cara" porque a situación sanitaria é "grave" e os nacionalistas queren "claridade".
"O virus non colle vacacións e o Parlamento debe abrirse para que Feijóo dea explicacións", subliña, antes de pedir "depurar responsabilidades" tamén na Consellería de Sanidade e Vicepresidencia, como principais "executoras dun desatino" que levou a aplicar durante tres semanas unha medida "sen cobertura xudicial". Para rematar, Bará cualifica a forma de actuar do Executivo autonómico como propia "dun réxime caudillista, absolutista e autoritario".
"O virus non colle vacacións e o Parlamento debe abrirse para que Feijóo dea explicacións", subliña Luís Bará
Pola súa banda, o secretario xeral do PSDEG, Gonzalo Caballero, urxe axudas á hostalería tras a redución de aforamentos e despois de que o TSXG tombase o requisito do certificado covid.
"DEIXE DE ESTAR DE VACACIÓNS". "É necesario que o Goberno da Xunta deixe de estar de vacacións e adopte un plan de axudas para a hostalería galega", chama a atención. Caballero reclama "seguridade xurídica, axudas económicas e un plan de futuro para afrontar un verán que é moi importante para a reactivación" do sector.
O líder dos socialistas galegos lamenta así que Galicia teña "un goberno de chapuza que se saltou os dereitos fundamentais da cidadanía sen pedir autorización xudicial e agora deixou nun limbo de indefinición o plan reactivación para a hostalería".
