A portavoz nacional do BNG, Ana Pontón, defendeu este venres o "dereito das mulleres a manifestarse o 8 de marzo" e cargou contra o "machismo político" que ve en quen intenta tratar as mulleres como "cidadáns de segunda ás que hai que tutelar".
Nunha conferencia de prensa, Pontón referiuse á decisión da Delegación do Goberno en Madrid de prohibir por motivos de saúde "pública" todas as manifestacións convocadas para o 7 e o 8 de marzo na comunidade e que obedece, ao seu xuízo, a unha campaña "orquestrada polo PP e Vox á que parece que tamén sucumbe o PSOE".
A líder nacionalista, acompañada polas deputadas Olalla Rodil e Noa Presas, acusou aos partidos de dereita e extrema dereita de cuestionar o dereito democrático das mulleres a manifestarse na rúa. E iso ocorre cando o BNG ve máis necesario ca nunca que as mulleres saian á rúa a defender os seus dereitos en actos reivindicativos nos que se cumpran as medidas sanitarias porque "non é xusto" que se faga un chamamento a telemanifestarnos "ou quedar de novo en casa".
Fronte á prohibición, Pontón subliñou que durante a pandemia numerosos os colectivos puideron celebrar mobilizacións e concentracións "ao longo e ancho de toda España". "Ante todas esas mobilizacións, ninguén dixo nada", apuntou, á vez que recordou que en Galicia está convocada para o 10 de marzo unha folga xeral en Ferrolterra que a propia Xunta apoia, polo que "parece que o único perigo é cando as mulleres saímos á rúa a reclamar dereitos, igualdade e un futuro mellor".
Baixo estes argumentos, a líder do BNG avanzou que as mulleres "non van calar" nin tampouco a permitir que as intenten "criminalizar" porque parece que hai quen están a intentar "abonar o terreo para culpar as mulleres dunha cuarta onda" do mesmo xeito que fixeron o marzo pasado ao comezo da pandemia.
"Espero que Feijóo non teña medo a reunirse comigo", sentenciou Pontón, quen considerou, ante as solicitudes de reunións, que o presidente da Xunta debe iniciar unha rolda de contactos segundo marca o protocolo habitual.
"A rolda de contactos empeza con quen lidera a oposición; logo pode reunirse con quen queira", sostivo Pontón despois de que o xefe do Executivo propuxese aos portavoces da oposición que se puxesen de acordo para fixar unha reunión xa que o PSdeG tamén demandou un encontro co mandatario autonómico.
Este mesmo venres, o líder do PSdeG, Gonzalo Caballero, mostrouse disposto a reunirse con Feijóo na data e o sitio que dispoña "para trasladar e compartir ideas e propostas" e buscar acordos orientados a como enfrontar esta crise sanitaria e a posterior reconstrución de Galicia".
