A portavoz nacional do BNG, Ana Pontón, anunciou este mércores unha "ofensiva política" da súa formación no Parlamento, no Congreso e nos concellos contra a posibilidade de que o Goberno do Estado cobre peaxes por circular polas autovías.
Nunha rolda de prensa, Pontón denunciou que esta decisión "prexudica especialmente a Galicia pola súa condición periférica", polo que "está a xerar unha gran preocupación e oposición social, tanto entre a cidadanía, que ve con escándalo un novo sabrazo a unhas economías familiares moi debilitadas, como entre as empresas, porque a medida afectaría de cheo á súa competitividade".
Para a líder do BNG, a proposta é especialmente negativa para Galicia por esa "condición periférica", e tamén polo menor nivel de renda da cidadanía e por un "infradesenvolvemento das redes públicas de transporte". Segundo a portavoz nacionalista, a implementación das peaxes "só ten afán recadador e ten como único beneficiario as multinacionais da construción".
Para intentar frear esta decisión, o Bloque iniciará unha campaña nas institucións que comezará cunha proposición non de lei no próximo pleno da Cámara "para conseguir unha declaración unánime de Galicia ante esta medida".
A esta iniciativa seguirana mocións nos concellos para trasladar o debate ao conxunto da comunidade e no Congreso, con iniciativas para que o Goberno central retire esta medida. Nese punto, Pontón subliña que o Executivo estatal "ten unha débeda histórica con Galicia en infraestruturas", ao que se suma "o lastre de soportar peaxes elevadísimas en vías estratéxicas como a AP-9".
"O que debe facer o Executivo de Sánchez é aplicar dunha vez por todas as rebaixas das peaxes da AP-9 negociadas co BNG en lugar de idear novas formas de penalizar a maioría social", sentenciou Pontón, que nega que as peaxes nas autovías sexan "unha medida ecolóxica".
