O buque Blue Star, que permanece encallado na costa de Ares, desde a media noite do pasado venres, sufriu nas últimas horas un lixeiro desprazamento, debido á intensidade da forza das ondas que impactaron no seu casco, polo que aumenta tamén lixeiramente a escora que xa tiña, ademais de quedar a súa zona de proa no aire durante a baixamar.
Por outra banda, os traballos para poder bombear o gasóleo e o fuel desde os depósitos nos que está situado, na zona de proa, a outro deposito baleiro na popa, e que se atopa máis preto da costa, desenvolveuse ao longo do todo o día, nun operativo composto por 18 persoas, entre tripulación do buque, da empresa de rescate holandesa contratada polo armador e Ardentia Marine, con sede no polígono de Vilar do Colo, en Fene.
Mentres, en terra proseguiuse coa preparación do acceso para os camións cisterna e a fundición dunha zapata de formigón de grandes dimensións, un cubo de catro metros por cada un dos seus lados, á que se lles instalará unha viga de aceiro e sobre a que posteriormente se colocará un cable tamén aceiro, a modo de tirolina, e que sera fixada no propio barco no seu outro extremo.
Será deste cable de onde se colgará a mangueira, entre barco e terra, para extraer o carburante, 45 toneladas de fuel e 60 de gasóleo. Espérase iniciar os labores de transvasamento este xoves, día 28.
ESPERANZA DE RESCATE
Unha vez retirados os carburantes, librouse ao buque de algo máis de 100 toneladas de peso, que unido ás mareas altas previstas para as próximas xornadas, fan pensar aos equipos de rescate en poder conseguir o obxectivo de poder desencallar o buque sen ter que despezalo, sen que se descarte incluso o ter que realizar microvoladuras dalgunha roca no caso de que entorpecesen estas tarefas.
Ademais, no mediodía deste mércores chegou á zona o remolcador Veintiocho, pertencente á empresa Remolcadores Unidos S.A. (RUSA), con sede en Santander, e que foi contratado por SMIT Salvage para as tarefas de rescate.
Na zona tamén se atopa a remolcador María Pita, de Salvamento Marítimo, que substituíu ao Don Inda, que atracou na Coruña sobre as 13,00 horas, para dar descanso á súa dotación, xa que o barco con base en Cee (A Coruña) permaneceu desde o sábado nas proximidades do sinistro.
Tamén nesta xornada continuaron as restricións de paso de vehículos e persoas a determinadas zonas, sobre todo para non entorpecer os labores dos equipos que traballan en terra, que foron executadas por axentes da Garda Civil e da Policía Local de Ares.
