O alcalde de Baralla, Manuel González (PP), confirmou que o Concello espera conseguir "un anticipo" do consorcio de seguros para iniciar canto antes as obras de restauración da casa do concello, cuxa planta baixa quedou parcialmente destruída a causa do atentado atribuído ao grupo terrorista Resistencia Galega.
En declaracións a EFE, o rexedor local confirmou que o goberno local manterá mañá unha reunión cos representantes do consorcio para falar sobre o financiamento das obras de restauración, un encontro no que Manuel González solicitará que lle dean "o visto e prace a un anticipo" para non demorar os traballos de restauración.
De feito, o propio alcalde confirmou que aínda non hai unha valoración definitiva dos danos causados polo artefacto explosivo, porque aínda non se realizou unha "proba sobre o estado da estrutura", que solicitou o propio consorcio e que se encargará de elaborar "unha empresa especializada".
En calquera caso, á espera de que principien as citadas obras de restauración, o alcalde confirmou que os servizos municipais están a funcionar con relativa normalidade no centro social da localidade, situado a escasos metros da casa consistorial.
